hier Eine kleine Textauswahl:
seitnschprung
a schprung
auf d'seitn
kau maunchmoi
a lem rettn
und maunchmoi
oans in d'wöd setzn!
.......................
ih geh's jetz au
hob ih gsogd
zu meiner frau
und sie
sie hod sih gfreid!
sie häd sih
ned gfreid
häd ih gsogd
du gehsd mih au!
.......................
liacht
ih schdö gern
mei liacht
untan schöffü!
so siagd neamd
ob üwahaubd
oans leicht!
.......................
sensation
du bist fia mih a sensation
imma noh
imma scho
du bist fia mih so wundaboa
imma noh
gaunz und goa
du bist fia mih di greßte freid
imma noh
ned erst heid
du bist fia mih a waunsinnsfrau
imma noh
gaunz genau
du bist fia mih di große liab
imma noh
imma scho
.......................
lufdschlösser
kausd ned
ebnerdig
baun!
.......................
valuan
zersd
ziagd a laungsaum
umi
um dei
denga
um dei
gestern
zersd
nur gauns leichd
wiara schleia
umi um des
wos gwesn is
daun
deckd a zua
wos gwesn is
oiweu mehr
wosd gwesn bisd
daun
is nix mehr do
rund um dih
in dir drin
nur mehr nöwü
gauns dichta nöwü
.......................
bruggn
mauern baun
mid gedaunkn
vo gestern
gehd
ofd
oafocher
ois wia
bruggn schlong
mid ideen
via moang
.......................
süwesta
ih bi so bled
jeds joa
woat ih drauf
dass endlih
süwesta wird,
das ih endlih
neich
durchschdartn kau,
wos ändern kau
in mein lem -
wia wauns
untern joa
ned ah gang
.................................
greiz
bergauf
griag ih koa lufd
bergou
gschbiarih s'gnia
es is a greiz
es is oafoch
a greiz -
und des
is ah hih!
..................................
heid
fria
do hob ih ma nia
vorschdöhn kenna
wia des
in di dreißgajoa
passiern hod kenna.
heid
kau ih ma's vorschdöhn!
..................................
suppn
a jeder kochd
sei eigene suppn
a jeder spuckd
de aundern
in d'suppn.
und mia
terfns
auslöffün!
.........................................
gleich
so liab
so a tschoperl
so a gloans!
so siass
wias oan aulochd
des kinderl
des gloane!
so goidig
wias ausschdreggd
sei haund
sei schwoaze!
so a glick
dass des märchen
noh ned kennd
des märchen
dass olle
olle gleich san!
............................................
wünsch
in kopf frei
zan denga
in mund frei
zan redn
is ohr frei
zan hern
des häd ih
hoid gern
d'händ frei
zan gem
d'aung frei
zan seng
s'herz frei
zan gschbian
daun dad ih
nia frian
.....................................
winterzeid
gestern
grod zuwagschneibd
heite
eiskoid ogwiesn
...............................
knobb
wias weg san
vo dahaom
woans knobb
am vahungan
an weidn weg
haums ghobd
woan dabei knobb
am vahungan
jetz sans do
mittn unter uns
und san knobb
am vahungan
................................
is lem is sche
waun mih wer frogd
hallo, wia gehds
so sog ih drauf
bi ih bill gates?
mei göd reichd ned
ned hint, ned vuarn
sog ih dazua
fosd volla zuarn
wia soi's ma
denn do geh?
owas lem
is trotzdem sche!
.......................................
und daun
zersd
hauma uns kennd
haum gschnapsld
am flohmoagd
daun
haum ma uns kennaglernd
und daun
woa ma valiabd
und daun
haum ma gschdridn
und daun
woa ma valiabd
noh mehr
wia vorher
und daun
woa ma wühd
in wühda ehe
und woan noh mea
valiabd
und daun
noch a poa joa
woidt ma heiratn
und daun
noch a poa joa
haumma gheirat
und daun
und daun
woa ma valiabd
noh mehr
wia vorher
genau so
wia heid!
.......................................
glücksbüz
ih bin a glückspüz
ih hob so a
wunderboare
umgebung
oiweu wieder
jedn dog
gfrei ih mih drüber
wias mih umgibd
mei frau
......................................
hometrainer
ih hob
goa ned gwußd
wia super
so a heimtrainer is:
am dog
schbühn sih
meine enkerl damid
und auf d'nochd
vorn schlofngeh
häng ih
mei gwaund auffi!
super!
.....................................
einidenga
ih deng mih gern
eini in dih
doh maunchmoi
schreck ih mih
waun ih ma deng
wos da du dengsd
üwa mih
......................................
moßschdob
wauma bei oin
und jedn
oiweu gaunz
schdrenge
moßschdäb
aulegd
gehts augnmoß
gauns schnöh
valoan!
......................................
beichtn
meine sündn
beicht ih
reglmäßig
unsan pfoarra,
der hod a
schweigepflicht,
und es gibt
a kloane buße!
beichtat ih
meine sündn
meina frau
wa a schware
buße föllich
und a schweigepflicht
häd's ah koane!
.............................................
jung
schau ih eini
in an schpüagü
siag ih mih
scho richtig oid!
schau ih eini
in mei söh
füh ih mih
noh ziemlih jung!
deng ih zruck
mid mein hirn
merk ih schnö
ih wer oid!
deng ih viari
mid mein hirn
dengds noh sochn
de recht jung!
hoachd mei oazd
in mei herz
sogd a glott
ih bi oid!
hoachd mei frau
in mei herz
werih schnö
wieder jung!
.....................................
liacht
a liacht
is wos schens
a liacht
mochd ois hö
a liacht
mocht ois sichtboa,
ois!
leider!!